O presidente da Deputación de Pontevedra, Luis López, participou este mércores na inauguración da ampliación do Parque da Pesqueira en Mos. Este proxecto, resultado da colaboración entre o Concello, a Xunta e a Deputación, supuxo un investimento provincial de máis de 274.000 euros a través do Plan +Provincia.
O parque ampliado, que conta cunha superficie de 8.000 metros cadrados na contorna do Camiño de Santiago, ofrece diversas áreas para o desfrute da veciñanza: zonas para a práctica deportiva como o skate e a escalada, espazos de descanso, un parque infantil e un parque de auga.
Luis López destacou a cooperación entre as tres administracións para transformar este espazo, que se atopaba en semiabandono, nun lugar para o goce familiar. "Este proxecto nace da cooperación entre a Xunta, a Deputación e o Concello para facer posible que este espazo que estaba en semiabandono estea a disposición de toda a veciñanza", declarou o presidente.
O orzamento total do proxecto de ampliación e mellora ascendeu a 507.500 euros. A achega da Deputación, de 274.000 euros, distribuíuse en catro subvencións con cargo a tres anualidades do Plan +Provincia. Incluíronse axudas específicas para a construción dun depósito de auga (8.700€ no 2024) e dun parque infantil (11.200€), ademais de dúas achegas de 125.000 e 128.800 euros nos anos 2025 e 2026 para a ampliación xeral.
O presidente provincial tamén sinalou a importancia da cooperación interadministrativa, mencionando que "ata hai tres anos non podía haber un acto coma este, coa Xunta e a Deputación xuntas". Subliñou que este modelo de colaboración é o camiño a seguir polo ben da veciñanza.
A colaboración da Deputación co Concello de Mos nestes tres anos de mandato superou os 9,3 millóns de euros, non só a través deste proxecto senón tamén mediante outros plans de infraestruturas e cooperación.
