A mostra, organizada e comisariada polos catedráticos Antonio Chas e Montserrat Ribao, percorre a vida e a fortuna literaria de mulleres como Berenguela de Castela, María de Molina, Inés de Castro, Leonor de Guzmán, María de Padilla ou Catalina de Lancaster.
A exposición nace do traballo conxunto dos grupos de investigación Nocelba (liderado por Antonio Chas Aguión) e Ediciones y Estudios de Literatura Española (liderado por Montserrat Ribao Pereira), ambos os dous membros de Nocelba. A través de catorce paneis verticais, a proposta achega ao visitante figuras de grande interese histórico e literario que, segundo Montserrat Ribao, "loitaron, impuxéronse e pasaron á historia en tempos terriblemente hostís".
Entre as protagonistas atópanse tamén Juana Manuel, Leonor de Alburquerque e María de Castela. Os paneis amosan obras literarias nas que estas mulleres foron protagonistas, con contidos accesibles mediante códigos QR.
A exposición complétase cunha selección bibliográfica da Biblioteca da Facultade, que inclúe novelas históricas contemporáneas de autores como Peridis ou Almudena de Arteaga, que actualizan o legado destas figuras medievais.
Ademais, desde o 17 de setembro estará dispoñible na Biblioteca Virtual TECER, do grupo NOCELBA, un PDF interactivo que permitirá visitar a exposición electronicamente.
Como parte dos actos relacionados, o vindeiro 8 de outubro, o catedrático José Manuel González Herrán dará unha conferencia sobre o protagonismo de Estrella Tavera nun guión cinematográfico de Gonzalo Torrente Ballester e José Antonio Nieves-Conde, que foi rexeitado pola censura.
