O estudo ‘Radiografía do tecido empresarial en busca do crecemento’, elaborado pola Fundación AFI Emilio Ontiveros, sinala a presenza de sete sociedades galegas entre as cen 'scalers' do país, partindo dunha base de case 9.000 empresas activas dende 2008. As compañías viguesas ACSM Shipping, Recalvi, Micofer 2000 ETT e Vithas Diagnóstico son as que teñen a súa sede social na cidade olívica.
No caso de ACSM Shipping, especializada en inspeccións submarinas para sectores como o petroleiro e o gas, a súa transformación a gran empresa foi impulsada pola adquisición polo grupo italiano Prysmiam, que desembolsou 169 millóns de euros. Esta firma, que participou na inspección do pecio do 'Villa de Pitanxo', conta con bases internacionais e unha importante frota de robots submarinos.
Pola súa banda, o fondo de investimento Abac Capital adquiriu unha participación maioritaria en Recalvi SL, principal distribuidor independente de recambios e accesorios do automóbil en España. Esta operación forma parte do plan estratéxico de crecemento do Grupo Recalvi, que prevé alcanzar os 500 millóns de euros de facturación en 2028.
O informe tamén destaca a Vithas Diagnóstico, división de análises clínicas do grupo hospitalario Vithas, propiedade do 'family office' Goodgrower da familia Gallardo. Outras empresas galegas mencionadas son as coruñesas Comercial Malasa e Universal Support, e a lucense Empresa Monforte (transporte de viaxeiros).
Galicia sitúase así entre as comunidades con maior representación neste ranking de empresas con alta capacidade de crecemento, aínda que Madrid e Cataluña lideran con 26 e 22 compañías respectivamente.
