A xornada comezou co obradoiro infantil “Paisaxes ao baleiro”, deseñado para nenos e nenas de 3 a 12 anos. Esta proposta invitou ás familias a explorar a mostra de Ardid a través da creación artística, utilizando elementos da natureza para recrear paisaxes imaxinarias nunha actividade participativa.

Pola tarde, o propio artista Alberto Ardid guiou unha visita comentada á súa exposición “Hai un lugar”. Durante o percorrido, Ardid compartiu co público as súas reflexións sobre o proxecto, que combina escultura e instalación para ofrecer unha visión crítica da realidade contemporánea, matizada por sinais de esperanza.

Ademais, a xornada incluíu a apertura da nova mostra “Secuencias, paisaxes”, que presenta obras de Jonathan Hernández, Enrique Ježik e Jorge Macchi. O director do museo acompañou aos asistentes nun percorrido por esta exposición, que explora a interrelación entre a arte, a linguaxe e a actualidade social.