O Festival Internacional de Teatro de Ourense (FITO) regresará á cidade do 15 ao 25 de outubro coa súa XIX edición, presentando un total de 17 espectáculos. O certame contará coa participación de compañías galegas, españolas e foráneas, e parte da súa programación terá lugar no campus de Ourense, entidade colaboradora un ano máis.
A organización do FITO concibe o festival como un "motor de dinamización cultural esencial para a cidade e a provincia", destacando a súa viabilidade e rendibilidade tras 19 anos de traxectoria. Subliñan que o evento é unha "infraestrutura cultural inmaterial" que equilibra a creación artística profesional, o impulso do talento novo e a economía do sector servizos en Ourense.
As representacións terán lugar principalmente no Teatro Principal, pero tamén se estenderán ao campus de Ourense, o Liceo, a Praza de San Martiño e as rúas do centro. Como novidade, o festival inclúe actuacións en Celanova e Ribadavia. A programación iniciará o xoves 15 coa estrea de Thelma e Lola, da compañía Teatro de Ningures, reafirmando o compromiso coa creación orixinal e as estreas absolutas.
Tamén se presentarán espectáculos con "selo de excelencia" da Rede Nacional de Teatro e Auditorios, como Costura da compañía catalá Elena Romero, unha proposta de teatro documental e feminista, e Poeta (perdido) en Nova York da compañía El Aedo, unha visión tecnolóxica de Lorca. A nivel internacional, chegarán desde Arxentina e Colombia as compañías El Rayo Misterioso con Todo terminará por Navidad e L’Explose con Entrecruzad@s.
No campus de Ourense, a sala Emilia Pardo Bazán acollerá o mércores 21 67 Graos Ourense Fervescénica, un evento que reunirá cinco propostas artísticas de mozos creadores. Ourensefervescénica consolídase como un espazo fundamental para impulsar a creación escénica local e conectar novos talentos co público.
A programación complétase con Molto Barroco de Píscore Teatro, Bio Construción de Ibuprofeno, El Arte de la Guerra de Excéntricas, Sen Patrón de Pistacatro e a peza Dance Join da bailarina e coreógrafa Marta Alonso.
A edición deste ano foi presentada no Teatro Principal de Ourense por representantes das entidades colaboradoras, incluíndo a Agadic (Xunta de Galicia), a Deputación de Ourense, o Teatro Principal, o Liceo Recreo Ourensán, o concelleiro de Celanova e Sarabela Teatro, compañía organizadora.
