Tras as recentes informacións sobre a situación económica da entidade, Down Vigo quixo transmitir calma e subliñar que non existe ningún plan de desaparición. A organización, que atende a 218 persoas con síndrome de Down e discapacidade intelectual na área sur de Galicia, recalca que a súa prioridade é manter a actividade e a atención aos seus usuarios.

A entidade recoñece que o exercicio de 2025 pechouse cun déficit próximo aos 240.000 euros. Este resultado atribúese principalmente ao incremento dos custos salariais, derivados da aplicación do convenio colectivo estatal do sector, e á redución de axudas económicas recibidas.

Para asegurar a viabilidade futura, Down Vigo puxo en marcha diversas medidas. Entre elas, destaca a supresión do posto de director xerente, o incremento das cotas de socios e servizos, e un axuste de persoal co obxectivo de minimizar o impacto na atención aos usuarios.

A asociación tamén desmentiu calquera posibilidade de externalización dos seus servizos de atención profesional. A única opción que se estudou foi a posibilidade puntual de apoio externo en logopedia, unicamente se non se puidese cubrir con profesionais propios. Ademais, mostraron a súa disposición a dialogar cos traballadores para afrontar a situación de forma colaborativa.

Down Vigo insiste en que o seu obxectivo principal segue sendo preservar a calidade da atención, a estabilidade dos programas e o modelo de acompañamento integral que desenvolve dende 1989, un proxecto considerado esencial para centos de persoas e familias da área de Vigo.