O proxecto NaSOS, unha iniciativa coordinada polo CINBIO (Centro de Investigación en Nanomateriais e Biomedicina da Universidade de Vigo) e desenvolvida en colaboración con NanomedCSIC e a Fundación Española para la Ciencia y la Tecnología (FECYT), busca trasladar os compromisos da sostibilidade das políticas científicas ao día a día dos proxectos de investigación, os laboratorios e a toma de decisións en I+D.
Financiado pola convocatoria de axudas para o fomento da Cultura da Innovación Pública (I+P) 2025 de FECYT, o proxecto utiliza a nanomedicina como ámbito piloto para analizar de forma práctica como integrar a sostibilidade desde o deseño e a seguridade ata a transferencia e aplicación final, pasando pola calidade da evidencia científica e a actividade no laboratorio.
O lanzamento do proxecto tivo lugar no campus de Vigo coa celebración do Foro NaSOS – Nanomedicina sostible: retos e solución na sala de seminarios de Torre CACTI. Este encontro participativo serviu para identificar e priorizar retos, oportunidades e necesidades relacionadas coa sostibilidade na investigación en nanomedicina.
A xestora do CINBIO, Noa Caramés, e María del Puerto Morales Herrero, coordinadora de NanomedCSIC, deron a benvida aos asistentes. Lorena Blach, da Unidade de Xestión do CINBIO, presentou o obxectivo do proxecto e os eixes de análise do foro.
Posteriormente, Miguel Rodríguez Méndez, catedrático de Economía Aplicada da Universidade de Vigo, impartiu o relatorio "Integrar a sostibilidade na investigación: por que, para que e por onde comezar", ofrecendo unha aproximación transversal á tradución da sostibilidade en decisións concretas de I+D.
Carlos Rumbo Lorenzo (ICCRAM-EST, Universidade de Burgos) e Rebeca Alonso Bartolomé (Nanovex, Nalón Innova) presentaron o relatorio "Cara unha nanomedicina máis segura e sostible: do deseño á traslación", abordando a avaliación da seguridade de nanomateriais e os requisitos regulatorios.
A xornada incluíu tamén unha mesa redonda sobre as condicións para integrar a sostibilidade na investigación en nanomedicina, coa participación de Luis Liz Marzán (CINBIO-UVigo / CIC biomaGUNE), Miguel Rodríguez (GEN / Ecobas), Carlos Rumbo Lorenzo (ICCRAM-EST), Enrique Rohrer (GAIN) e Noelia Vilar Vidal (Feuga).
O foro concluíu cunha sesión técnica con catro mesas de traballo simultáneas sobre deseño seguro e sostible, calidade e trazabilidade da evidencia científica, xestión sostible de laboratorios e aplicación/transferencia sanitaria e social. As conclusións servirán de base para futuros talleres e a elaboración da guía NaSOS.
