Os campamentos da Lanzada, organizados pola Deputación de Pontevedra, preparan a chegada da novena quenda de participantes. A partir deste domingo 16 de agosto, un total de 140 nenos e nenas procedentes de 32 concellos da provincia gozarán dun programa de ocio que se estenderá ata o 5 de setembro. Ao longo de once quendas, máis de 1.500 menores empadroados nos concellos pontevedreses participarán nestas actividades.
O deputado de Xuventude e Reto Demográfico, Jorge Cubela, visitou as instalacións para supervisar o desenvolvemento do programa. Durante a súa visita, puido observar algunhas das actividades nas que participa a rapazada da oitava quenda, como o "Desafío rural", onde constrúen cabanas e aprenden sobre flora local, e un obradoiro de creación de mascotas con materiais reciclados. Na última quenda, elixirase a proposta gañadora para que sexa a imaxe oficial dos campamentos do próximo ano 2027.
Os participantes desta nova quenda proceden de concellos como Vigo (51 nenos), Pontevedra (20), Tui (7), Vilagarcía de Arousa (4), Ponteareas (4), Soutomaior (4), Meis (8), entre outros. Ao longo de seis días, ata o sábado 22 de agosto, os rapaces poderán desfrutar de actividades educativas, culturais, deportivas e formativas.
No Centro de Vacacións da Lanzada, situado en San Vicente do Mar (O Grove), a cativada ten á súa disposición un amplo programa que inclúe deportes como bodyboard, snorkel, tiro con arco e carreira de obstáculos, ademais de actividades artísticas, científicas, en lingua inglesa, nocturnas, de coñecemento do medio, teatro, contacontos e baile. Tamén se organizan saídas e excursións a lugares emblemáticos como a praia da Lanzada e a illa de Ons.
