O Campus Auga da Universidade de Vigo celebra en Ourense os días 8 e 9 de outubro o seu VI Congreso Internacional, centrado na aplicación de tecnoloxías aeroespaciais aos desafíos ambientais. A programación principal xirará en torno á interrelación entre satélites, plataformas de gran altitude, drons e tecnoloxías de teledetección, ferramentas que están a revolucionar a observación e xestión do territorio. O evento está organizado pola Escola de Enxeñaría Aeronáutica e do Espazo e a Vicerreitoría do Campus de Ourense, e promovido polo Campus Auga, un proxecto de especialización financiado pola Xunta de Galicia.
Nun contexto global de presión sobre os recursos naturais e intensificación de fenómenos climáticos extremos, o congreso busca ofrecer unha visión estratéxica sobre o potencial das tecnoloxías aéreas e espaciais. A cita, patrocinada pola Deputación de Ourense, reunirá a investigadores, profesionais, empresas tecnolóxicas, entidades do sector primario e administracións públicas para fomentar o intercambio de coñecemento e a xeración de sinerxías.
Tras a inauguración, o congreso comezará cunha conferencia sobre GNSS R e innovación aeroespacial, impartida por Estel Cardellach Galí, investigadora do Institut d’Estudis Espacials de Catalunya. Ao longo dos dous días, haberá mesas redondas sobre Agricultura de Precisión, Incendios Forestais e Cambio Climático. O día 9 presentaranse demostracións de sistemas aéreos a cargo do grupo Aerolab da Universidade de Vigo, do proxecto Aeroganp e do equipo Pagaso da Garda Civil. A conferencia de clausura será ofrecida por Rubén Moreno, enxeñeiro xefe en Skydweller Aero. Presentaranse arredor de 26 comunicacións e pósters.
Os avances presentados abordarán a monitorización de cultivos, a xestión eficiente da auga, a prevención de incendios forestais e os impactos do cambio climático. O congreso combina relatorios, mesas redondas, demostracións tecnolóxicas e casos de éxito, co obxectivo de impulsar a colaboración e promover solucións innovadoras para a resiliencia ambiental.
