O Centro de Estudos e Investigacións Turísticas (Cetur), en colaboración co Instituto de Estudos e Desenvolvemento de Galicia (Idega), ambos da Universidade de Santiago de Compostela, fixeron entrega no Museo das Peregrinacións e de Santiago dos galardóns aos mellores Traballos de Fin de Grao (TFG) e Traballos de Fin de Máster (TFM) no ámbito do turismo. Os premiados do curso académico 2023-24 son estudos realizados no campus de Ourense por Miguel Peña, Iago Barreiro e Santiago Pérez, centrados no potencial do oleoturismo en Galicia e en Ourense Termal.
A iniciativa, que busca recoñecer traballos académicos que contribúan á análise e reflexión sobre a actividade turística, na súa primeira edición, premiou o TFG de Miguel Peña, "O potencial do oleoturismo en Galicia" (Programa Conxunto do Grao en Turismo e Xeografía e Historia da UVigo). Concedeuse tamén un accésit a Iago Barreiro e Santiago Pérez polo traballo "Desenvolvemento e validación dunha ferramenta para a avaliación da rendabilidade social en proxectos turísticos: aplicación ao destino Ourense Termal" (Grao en Administración e Dirección de Empresas da Facultade de Ciencias Empresariais e Turismo do campus de Ourense).
Para o curso 2024-2025, o premio ao mellor TFG foi para Laura Prego por "Oportunidades de Turismo Azul en Arteixo: Patrimonio Marítimo, Surf e Sostibilidade" (Grao en Turismo da Universidade da Coruña). O mellor TFM recaeu en Cristina Huertas polo seu "Proposta dun chatbot para divulgar o patrimonio documental do Códice Calixtino a través da IA" (Máster en Patrimonio Cultural Dixital da USC).
O xurado estivo composto por Lucrezia López (directora do Cetur), Iván Meléndez (director de Competitividade de Turismo de Galicia), Xosé Manuel Cao (xefe do Servizo de Cultura, Turismo e Promoción da Lingua do Concello de Lugo), María Milagros Vivel e María de los Ángeles Piñeiro (ambas da USC).
O Cetur e o Idega buscan con estes premios fomentar e visibilizar a investigación académica sobre turismo, promovendo o diálogo entre a universidade e os axentes do sector. Tamén pretenden consolidar a liña de investigación do Instituto sobre o turismo e o seu impacto no desenvolvemento territorial, económico e social de Galicia, reforzando o coñecemento e a comprensión dos desafíos e oportunidades turísticas para a comunidade.
