O Centro Tecnolóxico do Mar (CETMAR), dependente da Consellería do Mar, estivo presente na Unión Europea para participar nunha audiencia pública co Comité de Pesca (PECH). O encontro, celebrado en Bruxelas, centrouse na relevancia dos datos socioeconómicos como ferramenta fundamental para o deseño das políticas pesqueiras nas comunidades costeiras europeas.
A xornada dividiuse en dous bloques temáticos. O primeiro abordou o fomento do mellor asesoramento económico e social para a Política Pesqueira Común (PPC) da UE, mentres que o segundo explorou vías para integrar as análises socioeconómicas nos procesos de toma de decisións.
José Luis Santiago, coordinador da área de Socioeconomía da Pesca do CETMAR, interveu no primeiro bloque xunto á experta Marloes Kraan (ICES). Santiago expuxo tres puntos clave para reforzar os piares socioeconómicos da PPC: a necesidade de datos socioeconómicos actualizados, a importancia da dimensión xeográfica dentro do Marco de Recompilación de Datos (DCF) e a pesca dende a perspectiva da economía azul.
O técnico do CETMAR sinalou que a natureza cambiante da actividade pesqueira fai que a información oficial adoite estar desactualizada. Propuxo complementar as estatísticas con información cualitativa e redes de informantes para unha indicación máis temperá das presións económicas emerxentes. Tamén destacou que a agregación de datos no DCF pode ocultar efectos negativos en segmentos específicos da frota ou en rexións dependentes da pesca, e alertou da limitada información sobre o uso do espazo mariño polas pesqueiras.
Finalmente, Santiago fixo fincapé na pesca como parte da economía azul, subliñando os seus efectos económicos indirectos e a necesidade de vincular a información pesqueira coas políticas mariñas globais, como a ordenación do espazo marítimo ou as medidas de conservación.
Tras esta primeira parte, outros expertos do IEO-CSIC e da Federazione Coldiretti analizaron a integración das análises socioeconómicas na toma de decisións, explorando vías prácticas para incorporar estas avaliacións nas medidas de conservación e xestión. O foro concluíu cun debate sobre o uso e obtención de datos a nivel comunitario para mellorar a xestión pesqueira.
