O espectáculo ‘Meigas’, de Arantxa Treus e Jazmín Abuín, coñecidas como Sobria e Serena, inaugurou a continuidade do programa municipal tras o parón do verán. A iniciativa traerá ao municipio cinco novas propostas teatrais durante os meses de outubro e novembro.
Esta segunda edición de ‘Goza do teu Punto G’ busca fomentar o uso do galego na vida cotiá a través de actividades culturais como o teatro e a música. O alcalde de Soutomaior, Manu Lourenzo, destacou a importancia de dar continuidade a este programa, que anima á veciñanza a gozar do seu 'punto galego' e que traerá a Soutomaior 'referencias artísticas do noso país'.
A programación cultural, impulsada polas diferentes áreas municipais, inclúe espectáculos dirixidos a público adulto, xuvenil e familiar, coa participación de compañías e artistas de referencia da escena galega. O espectáculo inaugural, ‘Meigas’, que ofreceu humor e reflexión a través do monólogo, conseguiu un cheo absoluto no Multiúsos.
A axenda de espectáculos continuará os meses de outubro e novembro con varias propostas gratuítas ata completar a capacidade do aforo. O 11 de outubro, ás 17:30 horas, será ‘Mariñeiras’, de A Cova das Letras, para público familiar. O 18 de outubro, ás 17:30 horas, chega ‘Berenguela na gaiola’, de Xarope Tulú, en colaboración co Centro Dramático Galego.
Continuarán as funcións o 23 de outubro, ás 20:30 horas, con ‘Os Inocentes’, de Quico Cadaval. Xa en novembro, o 6 de novembro, ás 20:30 horas, será a quenda de ‘A ver que pasa’, monólogo de Evaristo Calvo. A edición pecharase o 13 de novembro, ás 20:30 horas, con ‘Enredadas’, monólogo de Leti da Taberna.
Con esta iniciativa, o Concello de Soutomaior reafirma o seu compromiso coa promoción e normalización da lingua galega, utilizando a cultura como espazo de encontro e dinamización social.
