A pesar de que o acto comezou pasadas as 12.00 horas coa presenza do rei Felipe VI, a raíña Letizia e a princesa Leonor, as condicións climáticas desfavorables, con ceos cubertos, forzaron a suspensión das actividades aéreas por motivos de seguridade.

A multitude de cidadáns congregados na avenida de Samil desde primeira hora da mañá puido presenciar a chegada das personalidades e o inicio do desfile terrestre, que percorreu os 1.165 metros da avenida. Os asistentes portaban bandeiras de España e aplaudiron aos diferentes convidados, entre eles a deportista Susana Gónzalez Gacio.

A exhibición aérea, na que estaba prevista a participación de aeronaves como tres Canadair (aínda que só un estaba dispoñible por mor de incendios noutras zonas de España), tivo que ser cancelada. Tamén se suspendeu o salto paracaidista que ía realizar o subtenente Alberto Vidal e o sargento primeiro Pablo García Matanza.

Durante o izado da bandeira de España produciuse un pequeno incidente ao precipitarse esta, un feito que non minguou o ánimo dos presentes que acudiron a celebrar a festividade a pesar do tempo.