Durante seis días, ata o sábado 18 de xullo, os menores participarán nun amplo programa de ocio que inclúe actividades de carácter educativo, cultural, deportivo e formativo. Estes campamentos forman parte dun programa máis amplo que, ata o 5 de setembro, acollerá a máis de 1.500 menores empadroados en concellos da provincia, distribuídos en once quendas.
Os participantes desta quenda proceden de concellos como Baiona, Bueu, Caldas de Reis, Cambados, Catoira, A Estrada, A Guarda, Lalín, Marín, Meis, Moaña, Moraña, Mos, As Neves, Poio, Ponteareas, Pontecesures, Pontevedra, O Porriño, Portas, Redondela, O Rosal, Salceda de Caselas, Tomiño, Valga, Vigo, Vilaboa, Vilagarcía de Arousa e Vilanova de Arousa.
No Centro de Vacacións da Lanzada, situado en San Vicente do Mar (O Grove), a cativada poderá gozar de actividades deportivas como deportes alternativos, tiro con arco, orientación e carreira de obstáculos dentro do campamento, ademais de bodyboard, snorkel e xogos de praia. Tamén se realizarán actividades artísticas, científicas, en lingua inglesa, nocturnas, de coñecemento do medio, teatro, contacontos, baile e culturais, incluíndo excursións á illa de Ons.
