Durante seis días, ata o sábado 15 de agosto, os participantes gozarán dun amplo programa de lecer que inclúe actividades de carácter educativo, cultural, deportivo e formativo. Esta é a sétima quenda dos campamentos de verán, que se estenderán ata o 5 de setembro e nos que participarán máis de 1.500 menores empadroados en concellos da provincia.
Os menores que chegan esta semana proceden de concellos como Vigo (33), Vilagarcía de Arousa (10), Pontevedra (12), Sanxenxo (7) e Cerdedo Cotobade (7), entre outros 36 municipios da provincia.
As instalacións da Deputación no Grove, situadas en San Vicente do Mar, ofrecerán actividades deportivas como deportes alternativos, tiro con arco, orientación, carreira de obstáculos, bodyboard e snorkel. Tamén haberá propostas artísticas, científicas, en lingua inglesa, nocturnas, de coñecemento do medio, teatro, contacontos e baile.
Ademais, os participantes realizarán excursións a lugares de interese como a illa de Ons, ampliando así o seu coñecemento do contorno natural e cultural da comarca.
