Este plan, que recolle 18 accións en eidos como o emprego, a cooperación, a vivenda e o aproveitamento dos recursos territoriais, busca potenciar o potencial da economía social para crear postos de traballo e fortalecer o tecido local.
Baiona foi un dos dous concellos seleccionados para participar neste proxecto piloto, impulsado pola Consellería de Emprego, Comercio e Emigración da Xunta. A súa elaboración partiu dunha análise socioeconómica e dun proceso participativo con axentes locais.
Na presentación interviron o alcalde de Baiona, Jesús Vázquez Almuiña, e a directora xeral de Traballo Autónomo e Economía Social, Marta Mariño Regueiro. Tamén achegou a súa experiencia a cooperativa local La Casa de las Redes.
O plan identifica áreas onde a economía social pode ofrecer solucións adaptadas á realidade de Baiona, coa finalidade de que as propostas se incorporen ás políticas municipais e se traduzan en actuacións concretas.
A elaboración do plan, que contou coa asistencia técnica de Larega Coop, tivo en conta as necesidades detectadas polos axentes locais e as posibilidades de colaboración entre o Concello, o tecido económico e social e outras administracións.
Os próximos pasos inclúen avanzar na integración da economía social nas políticas municipais, habilitar un espazo de coordinación e seguimento, e desenvolver accións segundo as capacidades do Concello.
Con esta iniciativa, Baiona aposta por un modelo de desenvolvemento máis sostible e inclusivo, baseado na cooperación e no talento local, para afrontar retos como o emprego e a diversificación económica.
