A Facultade de Dereito do campus de Ourense acolleu este xoves a xornada Paridade e equilibrio de xénero nos consellos de administración das sociedades mercantís e na alta dirección empresarial. A sesión ofreceu unha análise profunda das últimas modificacións normativas introducidas no dereito español neste ámbito e da súa efectividade. Paralelamente, celebrouse unha sesión sobre inmigración e xénero desde o punto de vista xurídico.
A xornada sobre paridade, financiada pola Unidade de Igualdade da Universidade de Vigo, estivo dirixida por Ana María Tobío, catedrática de Dereito Mercantil, e coordinada polo profesor Roberto Couto. O evento enmárcase no proxecto de investigación estatal Reformas lexislativas recentes e pendentes en materia de contratación e competencia empresarial, liderado pola Universidad de Córdoba e no que participa a UVigo.
A organización sinalou que a paridade de xénero na gobernanza corporativa é crucial para a igualdade de trato e oportunidades, mellorando a eficiencia e ética empresarial, en liña co Obxectivo de Desenvolvemento Sostible da Axenda 2030. Abordouse a análise das modificacións normativas españolas para acadar unha presenza equilibrada de xénero nos órganos de administración e alta dirección, avaliando a efectividade do modelo vixente e a necesidade de novas medidas.
Destacouse a directiva da Unión Europea 2022/2381, coñecida como Directiva Women on Boards, transposta en España pola Lei Orgánica 2/2024, ou Lei de Paridade. Estas normativas, que se aplican tamén a sociedades cotizadas e entidades privadas de certo tamaño, impoñen normas vinculantes cun réxime sancionador rigoroso, supoñendo un avance cualitativo na implementación de medidas favorecedoras da paridade.
A programación incluíu unha conferencia de Adoración Pérez, profesora titular de Dereito Mercantil da Universidad de Alcalá de Henares e vogal da Comisión General de Codificación, sobre o equilibrio de xénero nos consellos de administración. Seguiulle unha intervención de María Ángeles Alcalá, catedrática de Dereito Mercantil da Universidad de Castilla-La Mancha e tamén vogal da Comisión General de Codificación, sobre o procedemento de selección de conselleiros tras a Lei de Paridade.
A segunda xornada, Feminismo e teoría do dereito IV. Inmigración e xénero: estereotipos, vulnerabilidade e razoamento xurídico, contou coa intervención de Leticia María Delgado, profesora titular da Universidad Rey Juan Carlos de Madrid, quen falou sobre inmigración e políticas públicas con perspectiva de xénero. Esta actividade, organizada polo grupo AGAF, contou co apoio da Unidade de Igualdade da UVigo, do Instituto Universitario de Investigación. Xustiza e Xénero (IXEX) e da Xunta de Galicia.
