O Ministerio de Sanidade entregou este xoves en Madrid ao profesor da Universidade de Vigo Manuel Isorna a Cruz Branca da Orde ao Mérito do Plan Nacional sobre Drogas. O galardón recoñece a súa dilatada traxectoria de investigación científica orientada á transferencia social na prevención e abordaxe das adiccións.
As condecoracións da Orde ao Mérito do Plan Nacional sobre Drogas outórganse anualmente para recoñecer o labor de persoas e institucións que destacaron no eido da prevención, tratamento e control das adiccións, co fin de protexer a saúde pública e o benestar social.
Manuel Isorna é profesor titular do Departamento de Análise e Intervención Psicoeducativa na Facultade de Educación e Traballo Social do campus de Ourense e director do Mestrado en Prevención e Abordaxe Multidisciplinar das Drogodependencias e Condutas Aditivas. Tamén é presidente autonómico da sociedade científica Socidrogalcohol en Galicia.
A súa investigación céntrase na conceptualización da prevención de adiccións baseada na evidencia científica, abarcando a prevención escolar, familiar e comunitaria, as adiccións comportamentais como os videoxogos e o xogo de azar, e a análise crítica do consumo de substancias psicoactivas.
Ademais, dirixe o Mestrado en Prevención e Abordaxe Multidisciplinar das Drogodependencias e Condutas Aditivas da UVigo e a USC, un programa pioneiro no sistema universitario galego e nacional. Previamente, Isorna impulsou e coordinou programas de prevención comunitaria de adiccións no ámbito municipal, como os desenvolvidos nos concellos de Catoira e Caldas de Reis.
O profesor tamén destaca polo seu activismo social, participando como patrón e colaborador da Fundación Galega contra o Narcotráfico e asesorando a grupos de traballo institucionais en políticas de saúde pública.
