A operación, asinada ante notario en Vigo, refírese ás parcelas 5.3, 5.4 e 5.5, que suman unha superficie total de 62.979,54 metros cadrados. No acto participaron representantes das entidades implicadas, ademais do responsable da compañía conserveira.
A conserveira Albo, que obtivera o dereito de superficie en 2020 cunha opción de compra a 30 anos, iniciou a construción da súa planta na PLISAN en 2021. Dous anos despois, en 2023, comezou a produción e a actividade industrial nas novas instalacións. Agora, a empresa exerceu a opción de compra, formalizando a adquisición dos terreos.
“"É unha moi boa noticia porque o feito de que Albo decidise executar a opción de compra é a mellor proba da súa confianza na PLISAN."
A planta de Albo na PLISAN representou un investimento de 30 millóns de euros. Trátase dunha infraestrutura innovadora, deseñada para optimizar os fluxos de produción, con controis sanitarios rigorosos e unha loxística eficiente. Conta con sistemas propios de tratamento de augas, automatización, robotización e control dixital de procesos, o que lle permite superar as 100 toneladas de produto ao día e unha capacidade anual de máis de 100 millóns de latas.
Albo, unha das conserveiras históricas de Galicia fundada no século XIX (marca desde 1869), forma parte desde 2016 do grupo chinés Shanghai Kaichuang Marine International, especializado na pesca e procesado de produtos do mar.
