A xuíza do xulgado de instrución número 7 de Vigo acordou o sobresemento provisional e o arquivo da investigación sobre a botella de auga con gas que provocou queimaduras a un cliente dun restaurante. O afectado, Pablo González, expresou a súa "sorpresa" ante esta decisión, manifestando que non comprende certos aspectos da resolución xudicial.
González criticou, entre outros puntos, que non se chamase a declarar á empresa envasadora da auga, xa que está "a un 99% seguro" de que a botella estaba precintada cando a recibiu. Con todo, o auto xudicial indica que as dilixencias practicadas descartan "que se houbese producido ningún tipo de greta, quebra ou fallo de seguridade" no proceso de elaboración, embotellado ou distribución do produto.
“"Non é un tema de diñeiro, é un tema de xustiza."
A xuíza conclúe que a presenza de hidróxido de sodio (sosa cáustica) na botella servida no bar se debeu a un "erro humano ao encher con sosa cáustica unha botella xa consumida de auga mineral con gas de Aguas de Mondariz".
Un ano despois dos feitos, Pablo González segue a sufrir secuelas, incluíndo problemas dixestivos e un maior risco de padecer cancro, o que o obriga a realizar revisións médicas periódicas. O afectado tamén confirmou que rexeitou ofertas de compensación económica, reiterando que a súa prioridade é a xustiza.
