O programa Asiste-Ingbio (Axudas para o Soporte á Investigación en Sistemas e Tecnoloxías mediante a contratación de Enxeñeiros Biomédicos), desenvolvido pola Universidade de Vigo (UVigo), o Instituto de Investigación Sanitaria Galicia Sur (IISGS) e a Área Sanitaria de Vigo, xa puxo en marcha a participación de nove estudantes do Mestrado en Enxeñaría Biomédica. Estes alumnos realizarán prácticas titorizadas durante 18 meses, cunha dedicación de 10 horas semanais, en grupos de investigación do IIS Galicia Sur, achegando solucións a necesidades de servizos clínicos do hospital.
A presentación oficial do programa tivo lugar no salón de actos do Hospital Álvaro Cunqueiro. Nela, a reitora da UVigo, Carmen García Mateo; o xerente da Área Sanitaria de Vigo, Francisco Javier Puente Prieto; a directora científica do IIS Galicia Sur, Eva Poveda López; e o coordinador de Enxeñaría Biomédica da Área Sanitaria de Vigo, Alberto Fernández-Villar, destacaron a importancia desta colaboración institucional para a formación, a captación de talento e o fortalecemento das capacidades científicas no ámbito sanitario.
O programa, que segue a tendencia do mestrado, presenta unha maioría feminina, representando as mulleres o 66% do alumnado participante. As e os estudantes xa están a colaborar con diversos grupos do IIS Galicia Sur, incluíndo áreas como I-Saúde en Atención Primaria, Neumoloxía, Microbioloxía e Infectoloxía, Xenómica do Cancro, Enfermidades Raras e Medicina Pediátrica, Hematoloxía e Hemoterapia, Diagnóstico por Imaxe, CIES-CRIT e Innovación en Farmacia Clínica (i-FARMA-Vigo).
A doutora Ana Concheiro, xefa do Servizo de Pediatría do HAC e co-investigadora responsable do grupo Enfermidades Raras e Medicina Pediátrica, compartiu a experiencia positiva da incorporación de enxeñeiras biomédicas no seu servizo, destacando como achegan solucións a necesidades de funcionamento e deseño de elementos para terapias, o que, na súa opinión, "poñen en valor a posta en marcha deste Programa".
Pola súa banda, Sofía Vilanova, enxeñeira biomédica alumna de segundo ano do máster e participante no Programa ASISTE-INGBIO, destacou a súa experiencia persoal "no deseño dun sistema de reserva e xestión de espazos de consulta para Pediatría".
A reitora da UVigo, Carmen García Mateo, cualificou o programa como "un caso de éxito xa consolidado" e un "bo exemplo de como entendemos e queremos potenciar a formación universitaria: conectando docencia e investigación, favorecendo as colaboracións e xerando oportunidades reais para o noso estudantado". O xerente da Área sanitaria de Vigo, Javier Puente Prieto, salientou a importancia de seguir este camiño conxunto entre enxeñería e biomedicina para dar resposta ás necesidades sanitarias. A directora científica do IIS Galicia Sur, Eva Poveda, resaltou que a iniciativa "representa moi ben a forma na que entendemos a investigación desde o Instituto de Investigación Sanitaria Galicia Sur: colaborativa, interdisciplinar e estreitamente conectada coas necesidades reais do sistema sanitario".
O doutor Alberto Fernández Villar, coordinador de Enxeñaría Biomédica da Área Sanitaria e co-coordinador do Máster, xunto co catedrático da UVigo Juan Pou, explicou que estes estudos responden a unha necesidade existente ao cubrir un perfil que non existía nos servizos clínicos. A colaboración con enxeñeiros biomédicos demostrou ser puntual e estrutural, observándose a necesidade de profesionais con este perfil, o que agora inclúe o Sergas tras os bos resultados desta experiencia.
