A directora xeral de Persoas con Discapacidade, Begoña Abeijón, visitou esta mañá o centro residencial e ocupacional para persoas con discapacidade intelectual de EVD Galicia en Mos, acompañada pola alcaldesa da localidade, Nidia Arévalo. Durante o encontro, Abeijón puxo en valor os proxectos de vida independente que promove a entidade e nos que colabora a Xunta de Galicia.
A responsable autonómica agradeceu o labor dos profesionais que acompañan ás usuarias dos centros desta organización. Neste sentido, sinalou que a Xunta de Galicia financia 146 prazas de atención nos seus centros ocupacional e residencial de Mos e Crecente, aos que destina máis de 4,2 millóns de euros anuais. Este investimento proporciona ao sur de Pontevedra un servizo integral de coidados para persoas con discapacidade.
A directora xeral tamén destacou o labor de EVD Galicia na visibilización das necesidades das mulleres con discapacidade intelectual e no impulso da súa autonomía. Para estas iniciativas, a Xunta de Galicia concedeu á entidade máis de 355.000 euros no ano 2025, a través da orde de achegas do IRPF, para apoiar diversos programas.
