A incidencia, que se estendeu desde as 18:15 horas do xoves ata as 17:10 horas do venres, afectou principalmente aos núcleos urbanos de Xinzo de Limia e Verín, aínda que tamén se rexistraron problemas noutras aldeas da comarca da Limia, como Sandiás. A causa apunta a unha avaría nunha central troncal, o punto de conexión de todos os cables de fibra óptica da zona.
Ademais dos clientes directos de R, a interrupción do servizo tamén prexudicou aos usuarios doutras compañías como MásMóvil, Orange, Vodafone e a súa filial Lowi, que utilizan a infraestrutura de rede de R. Só os clientes de Movistar e Digi mantiveron a normalidade ao operar con redes independentes. Técnicos da operadora traballaron intensamente para restablecer a conexión, e aínda que non se confirmou a causa, especúlase que podería estar relacionada coas tormentas rexistradas o xoves.
“"Vímonos afectados pola avaría e a Secretaría estivo usando o móbil cos datos para poder traballar."
A rede de telefonía e internet móbil non se viu afectada, o que levou a moitos particulares e establecementos comerciais a utilizar os seus teléfonos intelixentes como puntos de acceso a internet para poder continuar coas súas actividades. Entre os afectados estivo o propio Concello de Xinzo, que tivo que recorrer aos datos móbiles para xestionar trámites e atender ao público.
Numerosos negocios, desde librarías e academias ata clínicas veterinarias, tamén sufriron as consecuencias. Un responsable dunha clínica veterinaria con sucursais en Xinzo e Verín explicou que, aínda que puideron cobrar con TPVs usando datos móbiles, non foi posible “procesar pedidos, acceder ás fichas ou consultar prezos de produtos, xa que temos todo na nube a través do ordenador”. A situación tamén provocou que moitos clientes non puidesen contactar con establecementos que tiñan o teléfono fixo inoperativo.
