O conselleiro de Emprego, Comercio e Emigración, José González, animou á presentación de solicitudes para estas axudas, cuxo prazo permanecerá aberto ata o vindeiro 15 de xullo. A iniciativa ten como finalidade principal a rehabilitación de vivendas destinadas a persoas traballadoras, contribuíndo así á fixación de poboación no ámbito rural.
Durante un encontro mantido co tecido empresarial e entidades da comarca de Verín, o conselleiro destacou que esta zona é especialmente propicia para o desenvolvemento desta orde de axudas, dada a alta porcentaxe de vivendas baleiras que presenta. "Cómpre tomar medidas para facer fronte a este desequilibrio", sinalou.
Esta proposta conxunta das consellerías de Emprego, Comercio e Emigración e de Vivenda e Planificación de Infraestruturas persegue tamén atraer talento para cubrir vacantes laborais e dar unha nova vida a inmobles deshabitados, sen rematar ou deteriorados, co fin último de asentar poboación no rural galego.
A orde de axudas desglósase en dúas liñas principais. A primeira está orientada a empresas e persoas físicas ou xurídicas, mentres que a segunda se dirixe a concellos con menos de 20.000 habitantes. As axudas máximas poden alcanzar o 95% do orzamento da rehabilitación.
No caso de vivendas unifamiliares, a contía máxima será de 50.000 euros por vivenda para empresas ou persoas físicas, e de 75.000 euros para concellos. Para edificios residenciais colectivos inacabados ou en fase de estrutura, a axuda non poderá superar os 30.000 euros por vivenda nin os 300.000 euros para o inmoble completo.
