O obxectivo principal desta alianza é promover iniciativas de prevención, concienciación e voluntariado na loita contra o cancro na localidade da Veiga. Estes puntos foron expostos nunha reunión entre representantes do Concello e da AECC.
Na xuntanza participaron Judit Vega Avelaira, xerente da AECC en Ourense; Eva Yáñez, concelleira de Cultura; Araceli Macías García, educadora familiar do Plan de Inclusión; e Marta Vila Comesaña, técnica de Turismo.
A xerente da AECC presentou o labor da asociación na provincia, destacando os servizos de apoio a persoas con cancro e as súas familias, así como os programas de voluntariado e as accións de prevención e información. Exploráronse vías de colaboración para achegar estes recursos aos veciños da Veiga.
Entre as accións previstas figuran charlas informativas, actividades de concienciación, a promoción de hábitos de vida saudables, a prevención e detección precoz, e a creación dun grupo de voluntariado.
