A Xunta de Galicia e a Fundación Reina Sofía destinarán máis de 170.000 euros a executar este ano dúas actuacións de restauración ambiental en espazos protexidos afectados por incendios forestais. As intervencións terán lugar nos concellos de Rubiá (Ourense) e Folgoso do Courel (Lugo).
A Súa Maxestade a Raíña Dona Sofía e a conselleira de Medio Ambiente e Cambio Climático, Ánxeles Vázquez, acompañadas por autoridades, visitaron hoxe as zonas obxecto destas actuacións, impulsadas polo convenio asinado entre ambas institucións en xaneiro.
En Rubiá, no Parque Natural Serra da Enciña da Lastra, recuperarase unha alvariza tradicional, tamén coñecida como colmear, que resultou danada por un incendio. O obxectivo é rehabilitar a estrutura para instalar colmeas activas, promovendo así a actividade apícola local e a restauración florística da contorna.
En Folgoso do Courel, na Reserva de Biosfera Ribeira Sacra e Serras do Oribio e Courel, crearase unha masa mixta de frondosas arredor da aldea do Vilar. Esta intervención restaurará un souto emblemático con exemplares centenarios afectados polo lume e protexerá o núcleo de poboación cunha franxa de vexetación menos inflamable.
Os proxectos xa están redactados e a Consellería de Medio Ambiente ocuparanse da execución. Espérase iniciar os traballos, cunha duración de catro meses cada un, ao longo deste mes de xullo, coa previsión de que estean rematados antes de que finalice 2026.
A conselleira Ánxeles Vázquez destacou o apoio da Fundación Reina Sofía, cunha achega de 65.000 euros, que se completará con fondos propios da Xunta e financiamento europeo do Programa FEDER. Subliñou que estes proxectos contribuirán á recuperación ecolóxica, social e paisaxística de ecosistemas clave.
Esta nova intervención en Folgoso do Courel complementa outras accións realizadas pola Xunta na zona nos últimos anos, como a rexeneración de bidueirais, carballos e outras frondosas, e a recuperación do vigor dos castiñeiros no souto da Devesa.
