Esta actividade, dirixida a mozos e mozas de entre 9 e 12 anos, ofrece recursos de conciliación estival e unha programación activa e formativa. O delegado lembrou que as iniciativas deste programa da Xunta están destinadas a mellorar competencias e habilidades a través da educación non formal, coñecendo a xeografía e o patrimonio natural, cultural e etnográfico de Ourense.
O campamento de montaña, que congregará a 420 rapaces ata o 31 de agosto na provincia de Ourense, inclúe actividades como tirolina, parque multiaventura, hípica, orientación e piscina. As instalacións contan con comedor, pavillón polideportivo, ximnasio, spa balneario, cancha de tenis e campo de fútbol.
Manuel Pardo subliñou que “con campamentos como este Galicia segue a ofrecer aos mozos e mozas e ás súas familias recursos de conciliación estival no marco dunha programación activa e formativa”. Engadiu que “o obxectivo final é garantir que as familias poidan estar tranquilas levando aos seus pequenos ás actividades da Campaña de Verán da Xunta por ser unha aposta segura de conciliación”.
A campaña ‘Modo Verán Activo’, que se estende ata setembro, alcanzou este ano as 11.932 prazas en Galicia en todas as súas modalidades, a cifra máis elevada da súa historia, cun aumento de 300 prazas respecto á edición anterior e un investimento de 5,5 millóns de euros. Na provincia de Ourense, esta campaña conta con 1.136 prazas.
