O acto de apertura contou coa participación de Lito Velo, concelleiro de Zas e membro do xurado, xunto con representantes da asociación organizadora. Durante o encontro, Velo lembrou os inicios do certame en 2016 e a súa evolución. Nesta ocasión, o festival incorpora o Fouciño de Mabel, unha iniciativa dedicada a manter viva a memoria de Mabel Montes, unha das persoas impulsoras dos Premios Fouciño.
O concelleiro referiuse tamén á importancia da cultura como espazo de encontro e participación social, destacando o papel de iniciativas como os Premios Fouciño na programación cultural de Baio. Pola súa banda, Alejandro Gándara, membro da asociación Premios Fouciño, agradeceu a colaboración do Concello de Zas e destacou a importancia da cooperación entre a organización e as entidades participantes.
A programación continuará este venres con actividades no IES de Baio, onde Raquel Rodríguez ofrecerá unha charla arredor da animación. Pola tarde, o Local Fouciño acollerá a proxección de varias curtametraxes galegas de animación, entre elas ‘Homeless Home’, ‘The Monkey’, ‘Sandwich Cat’ e ‘O corpo de Cristo’. A xornada completarase cun concurso de dobraxe en directo.
O sábado 24 concentrará boa parte das actividades, con propostas relacionadas coa creación audiovisual da mocidade, a presentación da curtametraxe realizada no obradoiro de documental da cooperativa A Furna e as proxeccións de ‘Jardín de Plástico’, de Daniela González, e ‘Os Poetas e o Lume’, unha peza creada desde o CEIP Labarta Pose de Baio. Pola tarde, ás 18:00 horas, terá lugar a competición oficial, coa proxección das curtametraxes finalistas das categorías Xeral e Escolar e a votación dos Premios do Público.
A programación pecharase na praza Jorge Mira cunha noite de premios e música. Ás 22:00 horas actuará Mal Juicio e, ás 23:00 horas, celebrarase a entrega dos galardóns. A música continuará coas actuacións de ünder & Diego Flâneur, Laura Lamontagne, Skanderani e Ningún DJ.
