Unhas 40 persoas, entre representantes das entidades organizadoras e promotores, déronse cita en Baio (Zas) para a entrega de galardóns. Os proxectos gañadores nesta fase comarcal son Lyra (Resurgo, S.L.) de Carnota, unha startup tecnolóxica baseada en intelixencia artificial; o Centro de Día Nicoli de Coristanco, enfocado na atención a maiores e dependentes; Ana Trasariz (Ana María Antelo Quintáns) de Baíñas (Vimianzo), unha marca artesanal sostible de deseño téxtil galego; e Air Fervenza de Mazaricos, un aloxamento turístico singular vinculado á natureza.
Estas iniciativas foron seleccionadas pola súa capacidade de innovación, xeración de emprego e contribución ao desenvolvemento do territorio rural. Cada un dos proxectos recibiu unha axuda económica de 1.000 euros e obterá a oportunidade de participar na fase nacional do programa Tierra de Oportunidades de CaixaBank.
O acto subliñou a importancia de apoiar o emprendemento como ferramenta clave para dinamizar as zonas rurais, fixar poboación e xerar novas oportunidades de futuro na comarca.
Tras esta fase local, as catro iniciativas seleccionadas incorporaranse ao concurso formativo 'El reto de Tierra de Oportunidades', onde se xuntarán con máis de 220 emprendedores de todo o Estado. Alí recibirán formación especializada, mentorías e novas vías para impulsar os seus proxectos e gañar visibilidade, grazas á colaboración coa empresa social Rural Talent.
A xornada concluíu cunha degustación de pinchos, promovendo un espazo de encontro e intercambio de experiencias entre todos os participantes.
