O deputado do BNG Oscar Insua solicitou formalmente no Parlamento que a Xunta de Galicia inicie canto antes os trámites para actualizar o proxecto da segunda fase da prolongación da autovía AG-55, que conectará a AC-432 coa localidade de Berdoais. A petición inclúe que este proxecto sexa sometido a información pública durante o presente ano 2026.
Os nacionalistas lembran que a primeira fase da obra, entre Santa Eirena e a estrada AC-432, xa pasou por información pública en febreiro de 2020, pero o expediente non se aprobou nin nese ano nin nos posteriores. Tras a presión política e veciñal, o proxecto da primeira fase tivo que ser actualizado en 2025 para adaptarse aos prezos de mercado e garantir a viabilidade da execución.
Dada a experiencia coa primeira fase, onde transcorreu case un ano entre a actualización do proxecto e a formalización do contrato, o BNG considera crucial adiantar todos os trámites da segunda fase. Instan ao Goberno galego a actualizar o proxecto da AG-55 entre a AC-432 (en Calo) e o cruce de Berdoias, e sometelo a información pública este ano. O obxectivo é poder incluír unha partida orzamentaria no orzamento de 2027 para licitar e iniciar os traballos de forma simultánea aos da primeira fase.
Segundo sinalan os nacionalistas, as actuacións de desmonte para a segunda fase xa están executadas e, a priori, non se prevén obras tan complexas como viadutos ou pasos superiores, en comparación coa primeira fase.
“"A este paso vai levar máis tempo facer esta infraestrutura que a Sagrada Familia de Gaudí, e iso que xa renunciaron a rematala como autovía. Non podemos permitir que se alongue máis tempo, é necesario actualizar o proxecto e licitar xa o segundo tramo, para que se execute de forma simultánea."
O parlamentario nacionalista tamén alertou sobre o risco de que o cruce de Vimianzo cara Camariñas se converta nun "embude", provocando un "auténtico caos no tráfico". Insua subliñou que o PP ten a responsabilidade de evitar esta situación, xa que "está nas súas mans".
