O complexo, inaugurado nos anos 60 e inactivo dende 2014 debido a deficiencias estruturais e problemas de xestión, recibirá un investimento inicial de 94.000 euros. Esta primeira fase de recuperación busca devolver a funcionalidade a unhas instalacións cruciais para a conservación da fauna fluvial.
A conselleira de Medio Ambiente e Cambio Climático, Ángeles Vázquez, visitou as instalacións de Sobrado, onde xa comezaron as obras. O obxectivo é que o centro volva estar operativo para a cría, reprodución e incubación de peixes autóctonos, como a troita común (Salmo trutta), e así obter exemplares xuvenís para a repoboación de ríos, lagos e encoros da comunidade.
Os traballos desta primeira fase, que se prevé que finalicen no verán, inclúen a renaturalización da contorna fluvial mediante o desbroce das marxes do arroio Rodelo e o acondicionamento da presa de derivación. Tamén se realizará o dragado das canles de auga e a limpeza do interior do recinto. Ademais, derrubarase a cámara frigorífica existente, instalarase un depósito de augas fecais, renovaranse as canalizacións de abastecemento, electricidade e telecomunicacións, e repararase o peche exterior e o portal de acceso.
A conselleira subliñou a importancia destas infraestruturas públicas para a recuperación das poboacións silvestres de peixes e a mellora das condicións ecolóxicas dos ecosistemas acuáticos. A posta en servizo deste centro de tempada para a produción de ovas embrionadas de troita común permitirá que a provincia da Coruña volva contar con instalacións deste tipo, sumándose ás xa existentes en Veral (Lugo), O Carballiño (Ourense) e Cerdedo Cotobade (Pontevedra).
Esta iniciativa, enmarcada no Plan de Recuperación, Transformación e Resiliencia e financiada pola Unión Europea-NextGenerationEU, busca que o centro entre en servizo canto antes. Tras esta primeira fase, será necesaria unha segunda para a rehabilitación do inmoble e os seus equipamentos, cuxo proxecto e investimento están actualmente en elaboración para a súa posible inclusión nos orzamentos de 2027.
