A traxectoria de Andrés Torreiro, de tan só 28 anos, é un exemplo de dedicación e talento. En apenas unha década, pasou de xestionar un chiringuito estival nunha praia fluvial a ser recoñecido como un dos mellores chefs do panorama nacional. O seu restaurante, D'Obra, situado na Rúa Camiño Vello de Santiago, 15, foi o escenario onde naceu o prato gañador.
A proposta que conquistou o xurado foi un allo porro á brasa, acompañado dunha holandesa de koji e unha majada de sardiña afumada e abelá, maridado con 1906 Black Coupage. Con esta creación, Torreiro buscou enxalzar un produto sinxelo, condensando a esencia de Galicia ao combinar a sardiña, símbolo da costa, con elementos do campo como a abelá e o allo porro.
“"Estou moi contento, é a primeira vez que me presentaba e tiven boas vibracións."
O xurado, composto por figuras como Luis Veira (chef de Árbore da Veira), Sergi Aritzeta (chef de El Truc), a xornalista gastronómica Raquel Castillo e Xabier Cubillo (responsable da Área de Cultura de Cervexa de Hijos de Rivera), eloxiou a súa "creatividade, técnica e compromiso" co produto de proximidade. Na competición, o seu amigo Miguel Vázquez, tamén con raíces en Melide e representando a Atípico Restaurante da Coruña, acadou o segundo posto.
O restaurante D'Obra, que celebrará o seu primeiro aniversario o vindeiro 7 de xuño, é froito dunha aventura compartida con Marybel Álvarez, nai e socia de Andrés. A pesar da súa recente apertura, o establecemento xa gañou recoñecemento pola súa cociña de obradoiro, onde todo se elabora desde cero, cunha especial énfase nas verduras e unha base tradicional.
