A iniciativa da Consellería de Cultura, Lingua e Xuventude recibiu 95 solicitudes nesta edición, 12 máis que na anterior, para levar a cabo proxectos de creación, investigación, mediación, formación e exhibición, coa participación da veciñanza e a atención á memoria, ao patrimonio e ás realidades sociais de cada contorna.
Entre os proxectos financiados atópase Laboratorio mutante. Imaxinarios en custodia de Outonia S. Coop. Galega Xuvenil (29.180€), centrado no patrimonio biocultural do Macizo Central e que se desenvolverá en Manzaneda, Montederramo, A Pobra de Trives, Chandrexa de Queixa e Vilariño de Conso.
A Fundación Uxío Novoneyra recibirá 23.700€ para Territorio Novoneyra IV, arredor do legado do poeta e da Serra do Courel, con accións en Folgoso do Courel, Pedrafita do Cebreiro, Quiroga, Becerreá e O Incio.
Aantena SC desenvolverá Cosendo mareas (30.000€), centrado na memoria mariñeira da Costa da Morte e nas mulleres do mar, con actividades en Zas, Cabana de Bergantiños, Laxe, Dumbría e Carnota.
Neodans SC obterá 28.500€ para Tecedora SóLODOS, con 12 actividades en espazos patrimoniais e naturais de Xunqueira de Espadanedo, Nogueira de Ramuín, Melón, Baños de Molgas, Portomarín e Pantón, conectando danza, poesía e banda deseñada.
A Mostra de Arquitectura Rural e Cultura Obradoira, de César García Piñeiro, recibirá 30.000€ para Habitar, con actividade en Vedra, Boqueixón, A Estrada, Culleredo, Navia de Suarna e O Saviñao.
José Luis Díaz García desenvolverá Devir (30.000€) en Navia de Suarna e Cervantes, explorando os futuros posibles dos Ancares mediante encontros e obradoiros.
A Asociación Cultural Abella Produccions contará con 20.500€ para Vendaval, mostra de cinema de autor galego e portugués en Bóveda, Monforte de Lemos, Sober, Sarria, Chantada, Pantón, O Saviñao e A Pobra de Brollón.
O Castro Art Village recibirá 30.000€ para Kinoterra initiative, un laboratorio de cinema con base na aldea de Mourelos (O Saviñao) e actividade tamén en Pantón, Bóveda e Taboada.
Culturactiva Sociedade Cooperativa Galega recibirá 28.120€ para Feituría, creando e construíndo cultura, con obradoiros de teatro comunitario e funcións en Barro, Val do Dubra, Vilar de Santos, Rois, Muras e Cuntis.
