A cooperativa Ecooo está a piques de finalizar o proxecto "Gardiáns do Bosque" na localidade de Donelle, en Sober. Tras unha xornada de portas abertas para veciños, a iniciativa, que xa encara a súa fase final, prevé a súa inauguración oficial para os primeiros días de setembro. O obxectivo é converter este espazo, antes en ruínas, nun centro de formación ecosocial, aloxamento rural e un polo de desenvolvemento para a economía social e solidaria.
Financiado con fondos públicos, investimento directo da cooperativa e préstamos participativos, o proxecto seguiu a filosofía de "rehabilitar sen borrar, habitar sen colonizar e transformar sen excluír", segundo explicou o responsable da iniciativa, José Vicente Barcia. A meta foi recuperar os tres espazos principais do conxunto arquitectónico para que Donelle sexa un lugar de encontro e experimentación, un refuxio climático que fomente novas formas de cooperación.
José Vicente Barcia lembrou que, ao chegar hai sete anos, atopou unha aldea en ruínas pola dificultade dos seus habitantes para mantela. A historia do lugar, con fornos, tear e fragua, reflectía un pasado artesanal e comunitario que Ecooo quixo preservar. Tras varios intentos, hai tres anos acadouse un acordo de compra co compromiso de conservar a memoria estrutural do conxunto, rexeitando propostas de derriba e construción nova por ser incompatibles coa esencia do proxecto.
A vocación ambiental do proxecto vese reforzada polo seu contorno natural. A rehabilitación compleméntase cunha estratexia de conservación da paisaxe, incluíndo a compra de terreos adxacentes para evitar a súa degradación.
As instalacións inclúen tres aulas, 21 habitacións e un restaurante. Ademais, adquiriuse bosques e prados circundantes para garantir a súa preservación. Aínda que as obras remataron, a actividade formativa xa se desenvolve dende hai dous anos en espazos próximos, consolidando unha comunidade arredor do proxecto.
O proxecto "Gardiáns do Bosque" distánciase dos modelos turísticos convencionais. Barcia insiste en que o obxectivo é habitar o espazo e integrarse na vida local, chegando a acordos cos veciños para que sigan utilizando os prados para o pastoreo do seu gando.
