O acusado, que traballaba en Abanca, recoñeceu este venres na Audiencia Provincial de Lugo a súa implicación nos feitos, atribuíndoos á súa dependencia das pastillas. A pena acordada supera en cinco anos a solicitude inicial da Fiscalía, que modificou a acusación de tentativa de homicidio a tentativa de asasinato antes da vista.
A pesar do acordo sobre a autoría e a responsabilidade penal, o xuízo continuou para determinar a responsabilidade civil e as indemnizacións. Neste punto, a entidade Abanca tamén compareceu como acusada, xa que se lle reprocha ter mantido no seu posto ao home, a pesar de contar cun expediente disciplinario previo, o que lle permitiu acceder aos datos persoais e económicos da vítima.
Estou arrepentido do sucedido. Non quería que lle pasase nada disto e recoñezo ter destrozado a súa familia sen querer e sen vontade propia.
A Fiscalía solicita unha indemnización de medio millón de euros para a vítima, mentres que a acusación particular eleva esta cifra a máis de 1,5 millóns de euros. A condena final inclúe 15 anos por tentativa de asasinato, cinco anos por roubo con violencia e tres anos por estafa.
Os feitos remóntanse ao 5 de febreiro de 2022, cando a muller foi atopada gravemente ferida na súa vivenda de Candamil, en Xermade. O acusado acudiu ao domicilio coa intención de subtraerlle o teléfono móbil para acceder á súa banca electrónica, propinándolle un golpe na cabeza. Posteriormente, realizou transaccións desde a conta da vítima á súa propia, por un importe próximo aos 20.000 euros.
Como consecuencia das lesións, a vítima tivo que ser ingresada na UCI do Hospital Lucus Augusti e actualmente desprázase en cadeira de rodas, residindo nun centro sociosanitario. Ademais da pena de prisión, o acusado aceptou unha orde de afastamento e outra de liberdade vixiada.
