O Concello de Guitiriz, xunto co Club Btteiros Cova da Serpe, organizou unha xornada que reuniu a máis dun medio centenar de deportistas na Antiga Escola de Roca. A mañá, aínda que fresca, presentou boas condicións meteorolóxicas para a práctica do ciclismo.
Antes de comezar o percorrido, os participantes tiveron a oportunidade de visitar o interior da antiga escola e coñecer a historia e o valor cultural da parroquia, grazas ás explicacións de D. Alfonso Blanco. Posteriormente, o grupo completou un percorrido polas aldeas e camiños da contorna, combinando deporte, natureza e coñecemento do patrimonio local.
Durante a ruta, as persoas participantes realizaron unha parada para repoñer forzas cun avituallamento de chocolate con churros, ofrecido pola Comunidade de Montes de Roca.
A xornada transcorreu sen incidencias, permitindo aos ciclistas gozar dunha nova experiencia de convivencia e coñecemento do territorio dentro do programa municipal.
