O torneo solidario de pádel «Xuntos pola memoria» reuniu un total de 188 xogadores nas instalacións de iPadel Mos entre os días 15 e 18 de outubro. A iniciativa, organizada por AFAGA Alzheimer e iPadel Fitness, contou co apoio institucional do Concello de Mos e coa colaboración de numerosas empresas.
A competición incluíu as categorías de segunda, terceira e cuarta, nas modalidades masculina e feminina, ademais da terceira categoría mixta. Entregáronse 42 premios entre os cadros principais e os de consolación.
As concelleiras do Concello de Mos Felisa Rodríguez e Laura Méndez asistiron á entrega de premios, acompañando á organización e aos participantes no peche desta cita deportiva e solidaria.
Baixo o lema «Xuntos pola memoria», o torneo buscou combinar a práctica deportiva coa sensibilización sobre o Alzheimer e outras demencias, ademais de apoiar o labor de AFAGA Alzheimer. Contou tamén cunha Fila 0 para facilitar a colaboración.
Destacou unha exhibición de xogadores de primeira categoría onde David García e Gonzalo Pérez se enfrontaron a Daniel Pereiro e Héctor Guisande.
AFAGA fixo entrega de recoñecementos ao Concello de Mos polo seu apoio e a iPadel polo seu labor, quen recibiu ademais o distintivo de Empresa Solidaria coas Demencias 2026-2027.
O presidente de AFAGA, Juan Carlos Rodríguez, destacou o valor do deporte na prevención e sensibilización sobre o Alzheimer, animando a outras empresas a colaborar.
A organización agradece a colaboración de Decathlon, GrupoFix Salud y Deporte, Podoactiva, Jim Sports by Softee, Viajes TravelMakers, Talaso Atlántico, Galektra, Uniaqua, Viveiros ADOA, Balneario Mondariz, Estrella Galicia, Eroski Vegalsa, Fundación Celta, Yamarco e Viña Costeira.
