A institución municipal quixo aclarar os detalles da intervención levada a cabo para atender as necesidades de auga dos veciños e veciñas do núcleo de Ferreira, que se atopaban sen subministración. A actuación consistiu en obter auga dunha boca de rega, que se atopaba ao 80% da súa capacidade, e destinouse directamente a cubrir as necesidades da veciñanza afectada, sen ser trasladada á estación potabilizadora.
O comunicado desmente que a auga se extraese directamente do leito do río Parga ou que se retirase auga do seu cauce, xa que a intervención se realizou a través da citada boca de rega. O Concello subliña que a actuación non se tería levado a cabo se existise algún risco para o río ou a súa contorna ambiental.
O obxectivo principal da intervención foi atender unha necesidade básica da veciñanza de Ferreira, garantindo o abastecemento de auga ás persoas afectadas. Por iso, o Concello considera importante que as informacións que se difundan sobre esta actuación se correspondan co acontecido e eviten interpretacións que poidan xerar confusión.
Esta aclaración busca que a cidadanía dispoña de información contrastada sobre a actuación realizada e a súa finalidade: atender as necesidades de abastecemento das persoas do núcleo de Ferreira que se atopaban sen subministración.
