O Concello de Vilalba anunciou un dispositivo especial de tráfico con motivo da celebración de O Gran Camiño, a volta ciclista profesional a Galicia. A saída da segunda etapa, que terá lugar o mércores 15 de abril, obrigará a pechar varias rúas e zonas de estacionamento no casco urbano.
As principais afeccións comezarán ás 8.00 horas do mércores 15, co peche ao tráfico do Campo da Feira, o aparcamento subterráneo e as rúas Xosé María Chao Ledo e Avenida Terra Chá (ata o cruce con Benxamín Paz). Posteriormente, ás 9.00 horas, sumaranse a Rúa da Pravia e a Rúa Basanta Silva.
Desde o Concello rogan que, na medida do posible, se limite a saída e acceso a garaxes privados durante o período que dure o corte de tráfico. Este finalizará sobre as 11.45 horas.
Ademais dos cortes de tráfico, estará prohibido estacionar vehículos en todas as localizacións mencionadas desde as 20.00 horas do martes 14 de abril. A normalidade no tráfico retomarase unha vez que os ciclistas abandonen o centro urbano, o que se prevé que ocorra arredor das 11.45 horas.
A xornada deportiva comezará ás 9.30 horas coa chegada dos equipos, que terán os seus aparcamentos no Campo da Feira e na Avenida da Terra Chá. O control de sinaturas realizarase na Praza da Constitución a partir das 10.30 horas. A saída neutralizada está programada para as 11.30 horas, despois do corte de cinta protocolario ás 11.25 horas, e os ciclistas dirixiranse cara a Barreiros, tras percorrer 158 quilómetros e pasar polos concellos chairegos de Xermade e Muras.
