Este xoves, a rexedora socialista de Vilalba, Marta Rouco, someteuse a unha cuestión de confianza co obxectivo de sacar adiante o orzamento municipal de 14,2 millóns de euros para o ano 2026. Con todo, o resultado da votación foi idéntico ao de hai dúas semanas, con oito votos a favor do PSOE e Vilalba Aberta, socios do goberno bipartito, e nove en contra do PP e o BNG.
A decisión do BNG de non apoiar a proposta debeuse, segundo a asemblea local, ao "incumprimento" previo de acordos por parte do goberno local. Tras o pleno, Rouco defendeu a medida como unha forma de evitar "un bloqueo sen ningún motivo" e asegurar que o concello non se quede sen orzamentos, cualificando a postura do BNG como "unha especie de cabezonería que non leva a ningún lugar" e que só atrasará a aprobación un mes.
“"Temos que esperar un mes máis por unha especie de cabezonería do BNG que non leva a ningún lugar"
Desde a oposición, José María García Leira, concelleiro do Partido Popular, manifestou non estar sorprendido polo resultado e acusou á alcaldesa de non ter negociado as contas durante quince días. García Leira confirmou que a súa formación explorará a posibilidade de presentar unha moción de censura.
“"Intentaremos facer outro tipo de goberno no Concello de Vilalba"
O Partido Popular considera que ten a "obriga" de buscar acordos con Vilalba Aberta e o Bloque Nacionalista para "intentar facer outro tipo de goberno no Concello de Vilalba", estudando "todos os temas legais" para tal fin. Este escenario abre un prazo dun mes, ata o vindeiro 9 de maio, para que a oposición poida presentar unha moción de censura. No caso de que non se presente ou non prospere, os orzamentos quedarán aprobados automaticamente.
