O proxecto cinematográfico xorde a partir do mesmo material documental e das gravacións realizadas durante anos en Sabucedo. A iniciativa busca trasladar a esencia da experiencia inmersiva a un formato de cine tradicional, mantendo a súa identidade orixinal.
“"A idea é facer unha curtametraxe de cine tradicional mantendo o mesmo universo de Fillos do Vento: A Rapa."
Este anuncio prodúcese tras o éxito internacional da proposta inmersiva, que foi galardoada co People’s Voice Webby Award na categoría de mellor historia inmersiva na 30ª edición dos Webby Awards. Este recoñecemento, outorgado por votación popular, destaca a calidade e o impacto da obra entre miles de candidaturas a nivel mundial.
A obra inmersiva Fillos do Vento: A Rapa é o resultado de sete anos de gravacións nas montañas de Sabucedo, onde cada verán se celebra un dos rituais máis singulares de Europa. A proposta documenta a relación entre os habitantes e os cabalos salvaxes a través dunha proxección panorámica de 270 graos, imaxe en 8K e son espacial. A súa traxectoria internacional inclúe participacións no Marché du Film do Festival de Cannes, o Festival de Cine Europeo de Sevilla e o SXSW de Austin (Texas).
