Este recoñecemento premia un programa que concibe a biblioteca como un espazo dinámico, aberto e de participación cidadá, promovendo o acceso á cultura e o fomento da lectura.
O proxecto galardoado desenvolveuse de maneira continuada, abarcando diversas actividades como clubs de lectura, obradoiros, presentacións de libros e encontros con autores, dirixidos a diferentes idades e colectivos co obxectivo de achegar a biblioteca á cidadanía.
A iniciativa tamén buscou fortalecer os vínculos da biblioteca con centros educativos, entidades culturais e sociais, ampliando así o seu alcance e xerando novas vías de participación comunitaria.
“"A biblioteca en acción: ler, crear e participar representa unha forma de entender a biblioteca como un espazo vivo, no que ler, crear, e participar."
A concelleira de Cultura, Begoña Sanjurjo, subliñou a importancia de manter actividades ao longo de todo o ano, non só de forma puntual, e destacou que o premio recoñece o traballo constante da biblioteca e a súa capacidade para achegar a cultura á sociedade.
Sanjurjo engadiu que recibir este galardón do Ministerio por terceiro ano consecutivo é un incentivo para continuar na liña de traballo actual.
A dotación económica do premio, que ascende a 2.777,77 euros, destinarase á adquisición de novos fondos bibliográficos, co fin de ampliar e actualizar a colección da Biblioteca Municipal El Viejo Pancho e ofrecer novos recursos á cidadanía.
Tanto a Biblioteca como o Concello de Ribadeo quixeron agradecer a colaboración de todos os sectores implicados: centros educativos, entidades culturais e sociais, autores e autoras, participantes nos clubs de lectura e, especialmente, aos usuarios que manteñen vivo este espazo.
