A Deputación de Pontevedra aprobou na Xunta de Goberno sete achegas por valor de preto de 1,8 millóns de euros para os concellos de Forcarei e Lalín, enmarcadas no Plan +Provincia 2026-2027. Este plan reparte este ano 85 millóns de euros para investimentos, gasto corrente e contratación de persoal en concellos de menos de 50.000 habitantes.
O presidente provincial, Luis López, anunciou que Forcarei recibirá máis de 80.000 € para a renovación do pavimento na rúa do Meixueiro, en Soutelo de Montes. O proxecto nesta rúa inclúe a demolición do firme actual, escavación, colocación dunha base granular e execución dun novo pavimento de formigón cunha banda de adoquín e acabado táctil, ademais de nova sinalización.
Pola súa banda, Lalín destinará máis de 1,7 M € á mellora e acondicionamento de accesos viarios en diversas parroquias e lugares. As actuacións proxectadas inclúen a extensión de aglomerado asfáltico en quente e pavimentacións de formigón armado, xunto coa limpeza de cunetas, o perfilado de taludes, a execución de drenaxes transversais e o repintado da sinalización viaria.
“"Como todas as semanas seguimos avanzamos no reparto dos 85 millóns de euros cos que conta este plan, que é unha peza vital para que a nosa provincia siga mellorando e se poidan prestar servizos públicos de calidade."
