O novo tramo de 3,5 quilómetros, situado no municipio de Teo, conecta A Ramallosa co enlace da estrada autonómica AC-241 en Pontevea. Esta nova vía, que se porá en servizo mañá mércores, contou cun investimento de 32,3 millóns de euros e será de uso gratuíto para os condutores.
Rueda subliñou que esta actuación é un exemplo do compromiso da Xunta coas infraestruturas seguras, cómodas e sostibles. "A sanidade, os servizos sociais, a educación, son fundamentais, pero tamén hai que facer estradas e conservalas, porque ter boas comunicacións é fundamental", indicou.
As obras do segundo e último treito da AG-59, que engadirá 4 quilómetros máis entre Pontevea e O Rollo (A Estrada), xa están en marcha cun orzamento superior aos 31 millóns de euros. Unha vez finalizada, a autovía terá 14 quilómetros e conectará Santiago e A Estrada en tan só 10 minutos, cumprindo unha demanda histórica.
Esta prolongación insírese nun plan autonómico de infraestruturas viarias de altas prestacións que mobiliza case 170 millóns de euros na comunidade. Outros proxectos en execución ou de inicio inminente inclúen a prolongación da autovía da Costa da Morte, a VAP Tui-A Guarda, o desdobramento da estrada Brión-Noia e a futura vía rápida Nadela-Sarria.
Coas actuacións en vías de altas prestacións, a Xunta prevé que o 85% da poboación galega resida a menos de 15 minutos dunha destas vías, mellorando así as comunicacións na comunidade.
A apertura ao tráfico do novo tramo realizarase mañá mércores, 22 de xullo. O sentido Pontevea-Santiago abrirase ás 09:30 horas, mentres que o sentido Santiago-Pontevea farase ás 12:30 horas, unha vez retirados os elementos de seguridade do enlace dos Verxeles. O enlace da Ramallosa estará operativo en todos os sentidos dende as 09:30 horas.
