Esta actuación, que conta cun orzamento superior aos 375.000 euros, esténdese ao longo de 40 hectáreas. Os traballos inclúen a retirada de especies invasoras e a plantación de frondosas que, segundo as estimacións, permitirán absorber ata 250 toneladas de CO2 nos vindeiros 35 anos.

A intervención desenvólvese en colaboración coa Consellería de Medio Rural, a través de Seaga, e ten como obxectivo transformar a contorna da infraestrutura viaria aplicando criterios de sustentabilidade ambiental e mellora paisaxística. Os traballos abranguen un tramo de 8 quilómetros da estrada e unha superficie total de 40 hectáreas na AG-59 e nos seus ramais AG-58 e VG-1.6.

A actuación inclúe a eliminación de especies invasoras e pirófitas, como mimosas e eucaliptos, para substituílas por árbores como abeleiras, bidueiros, freixos, castiñeiros, carballos e pradairos, ademais de plantas trepadoras e rastreiras como hedras e pervincas.

Unha vez rematada a fase de plantación, a planificación autonómica contempla un período posterior de conservación e mantemento de entre catro e cinco anos, co fin de garantir o correcto desenvolvemento da nova masa vexetal e consolidar esta recuperación ambiental na contorna da autovía que unirá Santiago e A Estrada, e que se prevé que estea totalmente operativa en 2028.