Os actos de vandalismo tiveron lugar aproveitando que as fiestras dos establecementos estaban abertas para refrescar ante a onda de calor. Os ataques afectaron a albergues situados en distintas zonas da localidade, incluíndo a Rúa Maior, a Rúa da Liberdade, a rúa Peregrino e o campo da feira.
Nun dos albergues afectados, explicaron que o incidente ocorreu pasada a medianoite e é a terceira vez que sofren un ataque similar nos últimos meses. Denuncian que os vándalos "fíxanse nas fiestras que están abertas e tiran os ovos dentro", o que causa "un dano gratuíto" e desperta aos peregrinos que dormen no interior. Cualifican a situación de "frustrante" para os pequenos negocios que traballan "de domingo a domingo".
Os ovos lanzados causan danos no mobiliario e obrigan a realizar unha limpeza profunda, ademais do mal cheiro que provocan, especialmente coas altas temperaturas actuais. Varios establecementos afectados presentaron denuncia nas dependencias policiais, sen comprender o obxectivo destas condutas.
“"É frustrante porque somos un negocio pequeno que estamos traballando de domingo a domingo. Atópasche este panorama e os peregrinos pídenche explicacións a ti."
A Asociación de Amigos do Camiño de Santiago na Comarca condenou estas actuacións, que ocorren nunha localidade que recibe miles de peregrinos. Dende o colectivo solicitaron un incremento da vixilancia para frear estes actos de "gamberrismo".
O Concello de Sarria, a través do edil de Seguridade Cidadá, Félix Seijas, tamén mostrou a súa repulsa ante estas condutas incívicas e asegurou que se traballa dende o ámbito policial para identificar aos autores e erradicar estas actuacións. A principios do mes pasado, xa se produciran outros actos vandálicos na vila, como a rotura de ventanillas de vehículos sen roubar obxectos de valor.
