O condutor dun turismo perdeu a vida tras un grave accidente rexistrado na estrada LU-657, no termo municipal de Triacastela. Segundo informou o 112 Galicia, o sinistro ocorreu cando o vehículo circulaba á altura do quilómetro 3, na parroquia de Lamas do Biduedo.
O centro de emerxencias recibiu o aviso ás 20:00 horas a través do Servizo de Urxencias Sanitarias de Galicia-061, que alertou da caída do turismo por un desnivel de varios metros. Ante a gravidade do suceso, o 112 solicitou a intervención dos Bombeiros de Sarria, da Garda Civil de Tráfico e de efectivos de Protección Civil.
Ademais, o 061 desprazou ao lugar do accidente o helicóptero medicalizado con base en Santiago de Compostela. Ao chegar ao punto, os equipos de emerxencias confirmaron que no turismo viaxaba unicamente o condutor. Tras o impacto, o home saíu despedido varios metros do vehículo, o que lle causou a morte.
