O accidente produciuse arredor das dúas da tarde. A pesar da espectacularidade do suceso, o condutor, que circulaba en sentido Sarria, sufriu feridas que, en principio, non parecían revestir gravidade. O turismo saíuse da vía á altura do quilómetro 37 da LU-546, impactou contra un peche de cemento, derrubou un sinal e regresou á calzada, onde quedou envorcado ocupando un dos carrís.
O servizo de emerxencias 112 Galicia foi alertado do sinistro a través do sistema de aviso do propio vehículo. Puideron establecer contacto co condutor, quen se mantivo consciente en todo momento, aínda que refería dor no peito. Unha ambulancia desprazouse ata Noceda para trasladar o ferido a un centro sanitario, e tamén acudiron efectivos de conservación de estradas e axentes da Garda Civil de Tráfico.
“"O home tivo moita sorte, porque se chega a ser un coche máis pequeno queda aí."
A curva de Noceda é un tramo da LU-546 que historicamente foi un punto conflitivo, coñecido por ser escenario de numerosos accidentes, algúns deles con vítimas mortais. A sinistralidade nesta zona reduciuse significativamente tras a apertura do corredor Sarria-Monforte, cuxo primeiro tramo entrou en servizo a finais do 2012, diminuíndo o volume de tráfico na LU-546.
