O período de solicitude de prazas para o comedor escolar da EEI Xela Arias para o curso 2026/2027 xa está aberto. Os interesados poderán presentar as súas solicitudes dende o 31 de xaneiro ata o vindeiro 4 de setembro, ambos os días incluídos.
O alumnado de nova matriculación deberá presentar a solicitude ao formalizar a súa matrícula, xeralmente durante o mes de setembro. O modelo de solicitude estará dispoñible no Rexistro Xeral do Concello de Sarria, na Secretaría da EEI Xela Arias e nas páxinas webs oficiais do Concello e do centro educativo.
As solicitudes poderanse presentar de forma presencial no Rexistro Xeral do Concello de Sarria, de luns a venres en horario de 9:00h a 14:00h. Tamén se poderá facer a través da sede electrónica dende as 00:00h do día de inicio do prazo ata as 23:59h do día de finalización, ou mediante calquera outro procedemento establecido na Lei 39/2015.
O servizo de comedor desenvolverase durante o período lectivo da educación infantil, dende o 9 de setembro ata o 21 de xuño, e terá como sede a propia EEI Xela Arias. O horario de funcionamento será de 14:30h a 15:30h.
Os usuarios consideraranse fixos se se inscriben todos os días lectivos do mes, mentres que os esporádicos pagarán unicamente polos días que utilicen o servizo.
O pagamento para os usuarios habituais realizarase de forma anticipada mediante domiciliación bancaria, coa correspondente autorización dos pais ou titores legais. Para os usuarios ocasionais, o pago será previo á prestación do servizo mediante transferencia bancaria á conta indicada nas bases.
