O condutor dun turismo faleceu tras sufrir unha saída de vía e precipitarse por un desnivel de varios metros na LU-657, no municipio lucense de Triacastela. O suceso tivo lugar cando o home circulaba pola citada vía, á altura do quilómetro 3, á súa pasada por Lamas do Biduedo.
O centro de emerxencias recibiu o aviso ás 20.00 horas a través do Servizo de Urxencias Sanitarias de Galicia-061, que alertou de que o turismo caera por un desnivel considerable. A raíz da alerta, o 112 Galicia solicitou a intervención dos Bombeiros de Sarria, da Garda Civil de Tráfico e de efectivos de Protección Civil.
O Servizo de Urxencias Sanitarias tamén mobilizou un helicóptero medicalizado con base en Santiago de Compostela. Ao chegar ao lugar do accidente, os equipos de emerxencias confirmaron que no vehículo viaxaba unicamente o condutor. Este saíu despedido varios metros tras o impacto, o que lle causou a morte.
